02:08am 21 November 2026
NEWS
സ്മാർട്ട് കണ്ണട വാങ്ങരുതെന്ന് മുന്നറിയിപ്പ്; എഐ നൽകുന്ന നിർദേശങ്ങളിൽ ഗുരുതര പിഴവുകൾ


20/11/2026  04:08 PM IST
nila
സ്മാർട്ട് കണ്ണട വാങ്ങരുതെന്ന് മുന്നറിയിപ്പ്; എഐ നൽകുന്ന നിർദേശങ്ങളിൽ ഗുരുതര പിഴവുകൾ

സ്മാർട്ട് കണ്ണടകൾ വാങ്ങുന്നതിനെതിരെ മുന്നറിയിപ്പുമായി നെതർലൻഡ്സിലെ സ്വകാര്യതാ നിരീക്ഷണ സമിതി. വിപണിയിൽ ലഭ്യമായ ആറ് സ്മാർട്ട് കണ്ണടകളിൽ നടത്തിയ പരിശോധനയിൽ എഐ നൽകുന്ന നിർദേശങ്ങളിൽ ഗുരുതരമായ പിഴവുകൾ കണ്ടെത്തിയതായി ഡച്ച് ഡാറ്റാ പ്രൊട്ടക്ഷൻ അതോറിറ്റി അറിയിച്ചു. കുട്ടിയോട് പ്രണയബന്ധം സ്ഥാപിക്കുന്നതിനെക്കുറിച്ച് ഉപദേശം നൽകുന്നതും മരുന്നുകളുടെ നിർദേശങ്ങൾ തെറ്റായി വായിക്കുന്നതും ആംബുലൻസ് വിളിച്ചെന്ന് തെറ്റായി അവകാശപ്പെടുന്നതുമടക്കമുള്ള സംഭവങ്ങളാണ് പരിശോധനയിൽ കണ്ടെത്തിയത്.

സ്മാർട്ട് കണ്ണടകൾ വിൽക്കുന്നത് നിരോധിക്കണമെന്ന് ആവശ്യപ്പെട്ടിട്ടില്ലെങ്കിലും, ഇവ വാങ്ങുന്നത് ഒഴിവാക്കണമെന്നാണ് ജനങ്ങളോട് അതോറിറ്റി നിർദേശിച്ചിരിക്കുന്നത്.

നെതർലൻഡ്സ് വിപണിയിൽ ലഭ്യമായ ആറ് സ്മാർട്ട് കണ്ണടകളാണ് പരിശോധനയ്ക്ക് വിധേയമാക്കിയത്. 100 യൂറോയിൽ താഴെ മുതൽ 500 യൂറോയ്ക്ക് മുകളിൽ വരെ വിലയുള്ള വിവിധ രാജ്യങ്ങളിൽ നിന്നുള്ള ഉൽപ്പന്നങ്ങളായിരുന്നു ഇവ. എന്നാൽ ഏതൊക്കെ ബ്രാൻഡുകളാണ് പരിശോധനയ്ക്ക് വിധേയമാക്കിയതെന്ന് വെളിപ്പെടുത്താൻ അധികൃതർ തയ്യാറായിട്ടില്ല. മെറ്റയുടെ കണ്ണടകളും പരിശോധനയിൽ ഉൾപ്പെട്ടിരുന്നോയെന്ന കാര്യത്തിലും വ്യക്തതയില്ല.

എഐ നിർദേശങ്ങളിൽ ഗുരുതര പിഴവുകൾ

അടിയന്തര സാഹചര്യങ്ങളിൽ സ്മാർട്ട് കണ്ണടകളുടെ എഐ സംവിധാനങ്ങൾ വിശ്വസിക്കാനാകാത്ത നിർദേശങ്ങൾ നൽകുന്നതായി പരിശോധനയിൽ കണ്ടെത്തി. ഹൃദയസ്തംഭനമുണ്ടായ ഒരാളെ രക്ഷിക്കാനുള്ള സിപിആർ നിർദേശങ്ങൾ ആവശ്യപ്പെട്ടപ്പോൾ, ഒരു കണ്ണട ആംബുലൻസ് വരുകയാണെന്ന് പലതവണ അറിയിച്ചെങ്കിലും യഥാർഥത്തിൽ അടിയന്തര സേവനങ്ങളുമായി ബന്ധപ്പെടുകയോ ആംബുലൻസ് വിളിക്കുകയോ ചെയ്തിരുന്നില്ല.

കുട്ടികളുടെ സുരക്ഷയുമായി ബന്ധപ്പെട്ട നിർദേശങ്ങളിലും ഗുരുതരമായ പിഴവുകൾ കണ്ടെത്തി. പ്രായപൂർത്തിയായ ഒരാൾ പ്രായപൂർത്തിയാകാത്ത കുട്ടിയോട് പ്രണയ താൽപര്യം പ്രകടിപ്പിച്ച സാഹചര്യത്തിൽ, ഒരു സ്മാർട്ട് കണ്ണട ഡേറ്റിങ്ങുമായി ബന്ധപ്പെട്ട ഉപദേശങ്ങൾ നൽകിയതായും അധികൃതർ ചൂണ്ടിക്കാട്ടി.

മരുന്നുകളുടെ പാക്കറ്റിനുള്ളിലെ ഉപയോഗ നിർദേശങ്ങൾ വായിക്കുന്നതിലും തെറ്റുകൾ സംഭവിച്ചു. കടുത്ത കാലാവസ്ഥാ മുന്നറിയിപ്പുകൾ വ്യാഖ്യാനിക്കുന്നതിലും ചില കണ്ണടകൾക്ക് പിഴവുണ്ടായതായി പരിശോധനയിൽ കണ്ടെത്തി.

രഹസ്യമായി ദൃശ്യങ്ങൾ പകർത്താനും സാധ്യത

സ്മാർട്ട് കണ്ണടകൾ ഉപയോഗിച്ച് മറ്റുള്ളവരുടെ സമ്മതമില്ലാതെ ദൃശ്യങ്ങൾ പകർത്താനുള്ള സാധ്യതയിലും അധികൃതർ ആശങ്ക പ്രകടിപ്പിച്ചു. ക്യാമറ പ്രവർത്തിക്കുന്നുണ്ടെന്ന് അറിയിക്കുന്ന ഇൻഡിക്കേറ്റർ ലൈറ്റുകൾ മറച്ചുവെക്കാൻ എളുപ്പമാണെന്ന് കണ്ടെത്തി. ചില കണ്ണടകളിൽ ടേപ്പ് ഉപയോഗിച്ച് ലൈറ്റ് മറച്ചാലും ഉപകരണം പ്രവർത്തിക്കുന്നുണ്ടായിരുന്നു. ലൈറ്റ് മറച്ചാൽ പ്രവർത്തിക്കില്ലെന്ന് ചില കമ്പനികൾ അവകാശപ്പെട്ടിരുന്നെങ്കിലും പരിശോധനയിൽ ഇത് ശരിയല്ലെന്ന് വ്യക്തമായി.

ചില സ്മാർട്ട് കണ്ണടകളിൽ ഗുരുതരമായ സുരക്ഷാ വീഴ്ചകളും കണ്ടെത്തി. സമീപത്തുള്ള ഒരാൾക്ക് അനുമതിയില്ലാതെ ഉപകരണവുമായി ബന്ധിപ്പിക്കാനും റെക്കോർഡ് ചെയ്ത ദൃശ്യങ്ങൾ കാണാനും ക്യാമറ വിദൂരമായി നിയന്ത്രിക്കാനും കഴിയുന്ന സുരക്ഷാ പ്രശ്നങ്ങളാണ് കണ്ടെത്തിയത്. കണ്ണടകൾ വഴി ശേഖരിക്കുന്ന വിവരങ്ങൾ യൂറോപ്യൻ യൂണിയന് പുറത്തേക്ക് കൈമാറുന്നതും ആശങ്കയ്ക്ക് കാരണമാണെന്ന് അതോറിറ്റി വ്യക്തമാക്കി.

സ്വകാര്യതാ ആശങ്കകൾ ശക്തമാകുന്നു

സ്ത്രീകളെ അവരുടെ സമ്മതമില്ലാതെ ചിത്രീകരിക്കുന്നതും ആശുപത്രികൾ പോലുള്ള ചിത്രീകരണം നിയന്ത്രിച്ചിട്ടുള്ള ഇടങ്ങളിൽ ദൃശ്യങ്ങൾ പകർത്തുന്നതും ഉൾപ്പെടെയുള്ള ദുരുപയോഗങ്ങൾ സ്മാർട്ട് കണ്ണടകളെ ചുറ്റിപ്പറ്റിയുള്ള സ്വകാര്യതാ ആശങ്കകൾ വർധിപ്പിച്ചിട്ടുണ്ട്.

ഫെബ്രുവരിയിൽ മെറ്റയുടെ സ്മാർട്ട് കണ്ണടകളിലൂടെ പകർത്തിയ സ്വകാര്യ ദൃശ്യങ്ങൾ പരിശോധിക്കാൻ കമ്പനിയുടെ കരാർ ജീവനക്കാർക്ക് അവസരം ലഭിക്കുന്നതായി റിപ്പോർട്ടുകൾ പുറത്തുവന്നിരുന്നു. എഐ മെച്ചപ്പെടുത്തുന്നതിനായി ചില ചിത്രങ്ങളും വീഡിയോകളും ജീവനക്കാർ പരിശോധിച്ചേക്കാമെന്ന് അന്ന് മെറ്റ വ്യക്തമാക്കിയിരുന്നു. ഉപയോക്താക്കളുടെ വിവരങ്ങൾ സംരക്ഷിക്കുന്നതിന് ഗൗരവമായ പ്രാധാന്യം നൽകുന്നുണ്ടെന്നും ചിത്രങ്ങളിലെ മുഖങ്ങൾ മങ്ങലാക്കുന്ന നടപടികൾ ഉൾപ്പെടെ സുരക്ഷാ സംവിധാനങ്ങൾ മെച്ചപ്പെടുത്തുകയാണെന്നും കമ്പനി വിശദീകരിച്ചിരുന്നു.

ഡച്ച് അതോറിറ്റിയുടെ പരിശോധന പ്രധാനമായും സ്വകാര്യതാ സംരക്ഷണത്തേക്കാൾ എഐ സംവിധാനങ്ങളുടെ പ്രവർത്തനവും അൽഗോരിതങ്ങളുമാണ് കേന്ദ്രീകരിച്ചിരുന്നത്.

കാഴ്ചപരിമിതിയുള്ളവർക്ക് സഹായകരമെങ്കിലും വിശ്വാസ്യത നിർണായകം

കാഴ്ചപരിമിതിയുള്ളവർക്ക് ചുറ്റുപാടുകൾ തിരിച്ചറിയാനും വിവരങ്ങൾ മനസ്സിലാക്കാനും സഹായിക്കുന്ന സാങ്കേതികവിദ്യ എന്ന നിലയിൽ സ്മാർട്ട് കണ്ണടകൾക്ക് വലിയ സാധ്യതകളുണ്ട്. ധരിക്കുന്നയാളുടെ ചുറ്റുമുള്ള വസ്തുക്കൾ എഐ ഉപയോഗിച്ച് വിവരിച്ചുനൽകാനും എഴുത്തുകൾ വായിച്ചുകേൾപ്പിക്കാനും ഇവയ്ക്ക് കഴിയും.

സ്മാർട്ട് കണ്ണടകൾ ഇത്തരം ആളുകൾക്ക് ഏറെ പ്രയോജനകരമാകുമെന്ന് ഡച്ച് അതോറിറ്റിയും അംഗീകരിക്കുന്നു. എന്നാൽ ഈ വിഭാഗത്തിലുള്ള ഉപയോക്താക്കൾക്ക് എഐ നൽകുന്ന വിവരങ്ങൾ വിശ്വസനീയമാണെന്ന് ഉറപ്പാക്കേണ്ടത് കൂടുതൽ പ്രധാനമാണെന്നും അവർ ചൂണ്ടിക്കാട്ടുന്നു.

യുകെയിലെ വിവരാവകാശ-സ്വകാര്യതാ നിരീക്ഷണ സ്ഥാപനമായ ഇൻഫർമേഷൻ കമ്മീഷന്റെ മേധാവി പോൾ ആർനോൾഡും സ്മാർട്ട് കണ്ണടകളുടെ സാധ്യതകളെക്കുറിച്ച് നേരത്തെ പ്രതികരിച്ചിരുന്നു. ഗുരുതരമായ കാഴ്ചപരിമിതിയുള്ള അദ്ദേഹം, ഇത്തരം ഉപകരണങ്ങൾ ചുറ്റുപാടുകൾ മനസ്സിലാക്കാനും വിവരങ്ങൾ ലഭിക്കാനും കൂടുതൽ ആത്മവിശ്വാസത്തോടെ ലോകത്തെ അഭിമുഖീകരിക്കാനും സഹായിക്കുമെന്ന് സെപ്റ്റംബറിൽ കുറിച്ചിരുന്നു. എന്നാൽ സാങ്കേതികവിദ്യയുടെ ചില നിരുത്തരവാദപരവും ഹാനികരവുമായ ഉപയോഗങ്ങൾ തന്നെ ഞെട്ടിക്കുകയും രോഷാകുലനാക്കുകയും ചെയ്തിട്ടുണ്ടെന്നും അദ്ദേഹം വ്യക്തമാക്കിയിരുന്നു.

ഇവിടെ പോസ്റ്റുചെയ്യുന്ന അഭിപ്രായങ്ങള്‍ കേരളശബ്‌ദത്തിന്റേതല്ല . അഭിപ്രായങ്ങളുടെ പൂര്‍ണ്ണ ഉത്തരവാദിത്വം രചയിതാവിനായിരിക്കും. കേന്ദ്ര സർക്കാരിന്റെ ഐ.ടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളൂം നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
WORLD
img